azad

بو سؤزدو درد دی قهر دی

سونو ایشیقدی ، سحردی

آتدی ، جیلوو دو ، یه هر دی

سؤزنن ظارافات ائیله مه

*

بو طالیعین بد یولودو

توزلو ، قوملو ، کند یولودو

کیمه سه جنت یولودو

سؤزنن ظارافات ائیله مه

*

سؤزون سؤزو پوزماغی وار

قایالارا یازماغی وار

ده وه کیمی قیزماغی وار

سؤزنن ظارافات ائیله مه

*

قیلینج کیمی سووار سؤزو

دؤیوشلره آپار سؤزو

قورخار سؤزدن  مزار سؤزو

سؤزنن ظارافات ائیله مه

*

هارداسا ارضین باشی دی

قصد - غرض بیلمز ، ناشی دی

هارداسا اهلت داشی دی

سؤزنن ظارافات ائیله مه

*

گؤزلریمه پایین یئتسه

گؤزون ایدین تورپاق آنام

سون سؤزومو ، سون آندیمی

گومولدانا – گومولدانا

دوسلار قازسین مزاریمی

*

قار اوداسی کرمین دیر

بولاق باشی علعسگرین

آراز اوسته سیوری دوران

بیر قایادا منیم یئریم

دوسلار قازسین مزاریمی

*

ایچی گولر اسمی دؤنوک

گؤزلریندن یاش اله یر

مقام تاپا ، یاش یئرینه

سون ائویم داش اله یر

دوسلار قازسین مزاریمی

*

حلال سؤزوم ، هارداس بیر

حلال قلبه دئییم دوشدو

هاردا چاشدیم ، هاردا آشدیم

یؤنسوزلویه یؤنوم دوشدو

*

گوناهلاریم چوخسا ییغین

بوکوب قویون باش آلتینا

بلکه ائله باشیم حلال

باش آلتداکی داش آلتینا

دوسلار قازسین مزاریمی

*

سینه م اوسته حک اولونا

خیش دسته یی ، بیرده قلم

اؤز قبریمه گوله – گوله

اؤزوم یئنمک ایسته ییرم

دوسلار قازسین مزاریمی

--------------

بوز قایالار چاپیقلاندی ، قارالدی

دورنالاری دؤنمز اولدو داغلارین

آلا گؤللر چامیرلاندی ، قارالدی

دورنالاری دؤنمز اولدو داغلارین

آزاد دورنام یول ایسته دی ، یول بؤلوک

تالا بؤلوک ، چالا بؤلوک ، گؤل بؤلوک

گؤیلویونو نئجه ساخلار بو گؤیلوک

دورنالاری دؤنمز اولدو داغلارین

ایکی جاوان بولاقدا سؤز باغلادی

دورنالارین یولونا گؤز باغلادی

ساخسی سنک گؤیردی ، بوز باغلادی

دورنالاری دؤنمز اولدو داغلارین

ایری لیگه اییلمه ین ایری قار

یاغدی سنه ایری یاغیش ، ایری قار

قوشا داغا قوشا گول له قویدولار

دورنالاری دؤنمز اولدو داغلارین

او واقیف دی - اوداسینا اود دوشن

او ذاکیردی - صدراسینا اود دوشن

او آرازدی - سما سینا اود دوشن

دورنالاری دؤنمز اولدو داغلارین

-------

سئوگی یولو ... دره سی بیر ، دوزو بیر

توتدون اونو ، آستاری بیر ، اوزو بیر

بو دره مه سن ، بیری یوزدور ، یوزو بیر

نه سایالی ، سایلی - یوللار واریمیش

چوخدا چوخا ، آزدا آزا قاییلدیم

من نفسیمی ایسته ییمدن آییردیم

سنین مئیلین اییلنده ، اییلدیم

دوزوکسن ایری یوللار وارایمیش

عؤمرو بویودان یئرینه قول آچدیم

قارلی داغدان قارلی داغا یول آچدیم

بیر اورگین ظولمتیندن یول آزدیم

نه یاخشی کی ، آیلی یوللار واریمیش

بو دونیایلا جنگه چیخسام ، یاشیم آز

قالالارلا بحث ائتمه یه ، داشیم آز

توز یوکونو مین آرایا داشیماز

نه سووقاتلی ، پایلی ، یوللار واریمیش

اوزون قارا گؤزونده کی کؤلگه دن

دیلین باتدی نه بیلیم ده ، بلکه ده

بیر عنوانا دؤندو یوموز دؤنگه ده

آیری سمته آیری یوللار واریمیش

------------

آنا یوردوم هر داشینا اوز قویدوم

هر دره نده چالدیغیمساز یاشاییر

کیمی سینین چیینینده سن ، کیمینین

شؤهرتینی یاشادان آز یاشاییر

بو گیلئی دن قلبیم یامان خاللاتیر

چوخ عنواندا قاچاق تعریف یاللاتیر

بیر عاغیلین بوداغیندان ساللاتیر

نئچه - نئچه عاغلی دایاز یاشاییر

گولوم بیرده گؤروشونه یوبانسام

آدیمی توت ، هاردا داغلار دومانسا

گؤزونو سیخ ، هانسی داشدا سو یاتسا

او داش آلتدا ممد آراز یاشاییر

--------------

خزلی پول اولان باغین

باغبانیندان قپیک چیخماز

باردان بارا سلام گؤرن

اریگیندن اریک چیخماز

درد دره دی ، دره میندی

چییرتکه لر ده وه میندی

دووشانلیق کی دبه میندی

گؤی تالایا الیک چیخماز

زامان چئینیر یئیین – یئیین

یاوانلیق دیر یالان – یئیین

یوزده دئیین ، مین ده دئیین

اسمی دؤنوک ،دؤنوک چیخماز

سؤز قینیرسیز گؤزلیمیدیر

دوز یولومدور ، دوز الیمدیر

نئیله ییم کی اؤز الیمدیر

اؤز الیمه چپیک چیخماز

----------

عشقینیز اولماسین چوروک ساپ کیمی

اللرده گزمه یین بیر کیتاب کیمی

کیمسه یه مست ائدن آل شراب کیمی

آخیب هر باده یه دولمایین قیزلار

اوینار قهقهه نیز شیمشکلر کیمی

عنوان سیز اولمایین کولکلر کیمی

قار آلتیندان چیخان چیچکلر کیمی

وعده سیز گؤیریب سولمایین قیزلار

سیرز بیر قاییق سیز ، طالع دنیز دیر

او بعضن بولاندیق بعضن تمیز دیر

طالع عاغلینیزدیر ، دوشونجه نیز دیر

طالعین قاییقی اولمایین قیزلار

----------------

عمورده توکنیر سؤزده توکنیر

باشیمین آلتیندان یاستیق دا قاچیر

اللر دیر اوچوران ، اللر تیکه نی

چؤللوکدن یاز قاچیر ، یازلیق دا قاچیر

دونیا دوزلمیرکی دوزلمیر بابا

..

کیمدن سه تئز دوروب کیمین اوشاغی

ایتینه داش آتیب بئش یوز ایل قاباق

کیمین ده ییرمانی کیمدن آشاغی

بونلاری یئرینده کیم اوتورداجاق ؟

دونیا دوزلمیرکی دوزلمیر بابا

..

طرفسیز طرفده دوز اوغلو دوزلر

طرفگیر طرفده سیلاح قان – قاد

چایینی ایتیرن ماوی دنیزلر

چیرپینیب بوغولر گؤز قاباغیندا

دونیا دوزلمیرکی دوزلمیر بابا

..

کیمین سه دوننی قبیرسیز قالیب ؟

کوتانچی باباسی دمیرسیز قالیب ؟

کؤروکچو آتاسی کؤمورسوز قالیب

دونیا دوزلمیرکی دوزلمیر بابا

..

من تکدیم ، جوت اولدوم تکلندیم گئنه

اؤزوم یوک چکنم ، اؤزوم ده یوکم

باخسام« دؤز » دییه نه « دؤز » دئییلنه

آغزیمدان قاپیلار اؤز حلال تیکه م

دونیا دوزلمیرکی دوزلمیر بابا

..

گئدیر یال داواسی سوموک داواسی

گئدیر وورهاوورلا چپیک داواسی

گئدیر میلیون چونون قپیک داواسی

دونیا دوزلمیرکی دوزلمیر بابا

..

« منم» دییه نلرین منی گؤرنمور

الی تپیکده دیر اؤزو هدفده

آزمیش عاغیللارین چنی گؤرونمور

ایتمیش ایتیریلمیش باشلار کلفده

دونیا دوزلمیرکی دوزلمیر بابا

..

هله بو دونیانین قیل و قالی چوخ

بیلمم زهری چوخ ، یوخسا بالی چوخ ؟

چوخ وئردیم اؤزومه بو سوالی چوخ

ارضین نادانیندان آغ ساققالی چوخ

بس نییه بو دنیا دوزلمیر بابا؟

-----------

گؤز یاشینی تؤک سینه مه دفن ائله

آغلاییرسان ساغلیغیمدا آغلا سن

قهرین وارسا ، ساغلیغیمدا قهر ائله

آغلاییرسان ساغلیغیمدا آغلا سن

..

وارمی ایندی آهدان یانان کرملر ؟

اودو اودلا سؤندوره جک صنم لر ؟

بیرده چتین اله دوشه بو دملر

آغلاییرسان ساغلیغیمدا آغلا سن

..

گئده ن گئده ر غمی قالار بیر ایچیم

فرقی یوخدور ، یا اوچ مینی ، یا اوچو

مزار اوسته چوخو آغلار گؤرک اوچون

آغلاییرسان ساغلیغیمدا آغلا سن

..

قورخ کی صاباح قبیرلرده چاپیلا

اینجیله شن گؤز یاشلاری قاپیلا

گؤز یاشلارین آل وئرجیسی تاپیلا

آغلاییرسان ساغلیغیمدا آغلا سن

..

اؤلوم اودور باشدا اوتورت ، باش اولمور

ساغلیق اودور تعریفلره آش اولمور

داشادا بوک ، داشی دا بوک داش اولمور

آغلییرسان ساغلیغیمدا آغلا سن

-----------

شهیدلرین چوخی مردلر

نامردلر آرتیر آی آللاه

نه سنه سسیم – هاراییم

نه الیم چاتیر آی آللاه

..

ها قوودوسا کاغیذ – قلم

همدمیم دی بو درد – الم

اؤز ایچیمده اؤز زلزله م

آییقجا یاتیر آی آللاه

..

کؤنول بؤیله دیدرکیمی ؟

دیدر قصدی ، دیدر کینی

حاق یولوندا دیدرگینی

حاققینا یئتیر آی آللاه

..

من گئدرگی عالم قالیر

باغری یانیق لاله م قالیر

دونیا دویماز ناله م قالیر

نامردلر آرتیر آی آللاه

..

هانی ؟ دئدیم دونیا منیم ؟

دونیا منیم غوغا منیم

دریا منیم دالغا منیم

اؤز گمیم باتیر آی آللاه

-----------------

هله عمروموزون نه یازی اولوب

هله بو دنیادا نه یاشامیشیق

بیزیم پاییمیزا چاتاسی اولوب

تسلی بیر قاشیق ، امید بیر قاشیق

..

دئمه کی عمروموز کئچدی یاریدان

بیز یئنه امیدلی گونلر یاری ییق

بیز کی گله جگه اینام ساریدان

دنیانین ان وارلی آداملاری ییق