موغانا جئیران
اوخویان: عاشیق کاماندار
بشنوید.
یئردن آیاغینی قوش کیمی اوزوب،
یای کیمی دارتیلیب اوخ کیمی سوزوب،
یئنه ئوز سورونی نظاملا دوزوب،
باش آلیب گئدیرسن هایانا، جیران؟
نه گوزل یاراشیر موغانا جیران!
ازلدن میلینی سالیب چوللره،
بختینی تاپشیردین بیزیم ائللره،
او قارا گوزلرین دوشوب دیللره،
دیشلرین اوخشاییر مرجانا، جیران!
نه گوزل یاراشیر موغانا جیران!
اوچی، اینصاف ائله، کئچمه بو دوزدن!
او چوللر قیزینی آییرما بیزدن!
قویما آغری کئچه اورگیمیزدن
قییما ئوز قانینا بویانا جیران!
نه گوزل یاراشیر موغانا جیران!
بیر مثل قالمیشدیر آتا – بابادان،
اوچاردا توراجدیر، قاچاردا جیران.
بیر من دگیلم کی، حسنونه حیران،
شهرتین یاییلیب هر یانا، جیران!
نه گوزل یاراشیر موغانا جیران!
سکوتا غرق اولموش اورگیمله
من کئچیرم یئنه ده موغان چولوندن،
یانیندا بالاسی، یاغیش گولوندن
اگیلیب سو ایچیر بیر آنا جیران،
نه گوزل یاراشیر موغانا جیران!
ائله کی، سون بهار مین بساط قورور،
کوللاری – کوسلاری ییغیب اوچورور،
سخناشیب بیر یئره، باش – باشا دورور
دوشنده چوغونا، بورانا جیران.
نه گوزل یاراشیر موغانا جیران!
اون آددیم کناردا یاتماییر تکه،
گزینیر، اویلاغا باش چکه چکه؟
گلن قارالتیدیر، یوخسا تهلکه؟
بیر ئوزونه باخیر، بیر اونا جیران
نه گوزل یاراشیر موغانا جیران!
