آ باشی بلالی فعله
یازان: میرزا علی اکبر طاهیرزاده شیروانی - صابیر
نه سوخولموسان آرایه آ باشی بلالی فعله؟
نه خیال ایله اولوبسان بئله ایدیعالی فعله؟
سنه دینمه دیکجه ایله آزیخوب چاشیرسان
قاپودا دایانماییپ دا زاله دوغری دیرماشیرسان
قارا فعله اولدوغوندا بیک و خانا چولغاشیرسان
بیه بیزده گورمیوپسن بو قدر جلالی فعله؟
نه چیغیر باغیر سالیرسان یورولوپ اوسانمائیرسان؟
ادبیله اوز مقامین تانیوب دایانماییرسان؟
هله کوهنه پالتاریندان قیزاریپ اوتانماییرسان؟
باشینا قویوپ گلیرسن یئکه بیر موتالی فعله
بونا باخ بو سیر صوفئتله دانیشیرده بیر عباره
گوزوم اغرییر ایدنده بو قیریلمیشا نیظاره
گتیریپ بوراخدی کیملر بولاری بیزیم دیاره؟
نه بیلیم هارالی کاسیب، نه بیلیم هارالی فعله؟
بیله عادتیدی اول بیگه یالواراردی کاسیب
نوجبا لری گورنده ایاغا دوراردی کاسیب
ایکی قات اولوب ادبله بیگه باش اییردی کاسیب
واریدی وفالی کاسیب واریدی حیالی فعله
دییشیب زمانه ایندی دولانوپ بوتون ایمورات
ایاغی چاریقچیلاردا کلوب ایسدئیر مساوات
بیله عصرده معیشت بیزه خوش کچیرمی هیهات
آییلیپ یاتان جماعت گوز اچیپ قاپالی فعله
اده فعله سن گئت اللش سنه گونلرین آی اولسون
گئت اولارلا سوز دانیش کیم سنه فقرده تای اولسون
بشریت عالمینده نئینه گوره پای اولسون؟
بو دگملی باش قولاغون آ باشی بلالی فعله؟
بشریت آختاریرسان هانی روتبه و جلالین؟
مدنیت آختاریرسان، هانی پول و مولک و مالین؟
عظمیت آختاریرسان، هانی خالیصن منالین؟
هانی طاقه طاقه شالین آ جیریق چوخالی فعله؟
دانیشیرسان آزقین ازقین، هانی قصری زرنیگارین؟
هانی آننا تک باریشنان ، هانی صوفیا تک نیگارین؟
هانی مجلیسی قومارین، رفقای میگسارین؟
هانی نشئه خومارین؟ آ قالین قفالی فعله؟
اگر ایسدئیدی آللاه کی سنی ائدیدی مقبول
بیزه ویردیگی تک البت سنه ده وئرردی پول مول
دی اوتان لیاقتیندن باری اولما بونجه مجهول
قوری بوش الیله اومما اوزنا کمالی، فعله
غلط اایله ائتمه بیرده بئله بوش خیالی فعله
دور ایتیل، جهنم اول گئت، ئوره گیم دارالدی فعله
