فعله لره
بو چرخ فلک ترسینه دوران ائدیر ایندی
فعله ده اوزون داخیلی اینسان ائدیر ایندی
اولماز بو کی هر امره دخالت ائده فعله
دولتلی اولان یرده جسارت ائده فعله
آسوده نفس چکمگه حالت ائده فعله
یا اینکه حقوق اوسده عداوت ائده فعله
بو چرخ فلک ترسینه دوران ائدیر ایندی
فعله ده اوزون داخیلی اینسان ائدیر ایندی
فعله منه بیر سویله نئدن حورمتین اولسون؟
آخیر نه سبب سوز دئمه یه قودرتین اولسون؟
ال چک بالا، دولتلیلره خیدمتین اولسون
آز چوخ سنه وردیکلرینه مینتین اولسون
بو چرخ فلک ترسینه دوران ائدیر ایندی
فعله ده اوزون داخیلی اینسان ائدیر ایندی
دولتلی آماندیر اوزونو سالما بلایه
فعله سوزو حق اولسادا باخما او صدایه
یول وئرمه نفس چکمگه هرگز فقرایه
ئوز شانینی پوچ ائله مه هر بی سر و پایه
بو چرخ فلک ترسینه دوران ائدیر ایندی
فعله ده اوزون داخیلی اینسان ائدیر ایندی
آلدانما فقیرین اولاماز عقلی ذکاسی
چون یوخدور اونون سن کیمی پاکیزه لیباسی
یوق ثروتی ی.ق دولتی یوق شالی عباسی
وار کوهنه چوخاسی دخی بیر تکجه قباسی
بو چرخ فلک ترسینه دوران ائدیر ایندی
فعله ده اوزون داخیلی اینسان ائدیر ایندی
ایسدرسن اگر اولماغا آسوده جاهاندا
تا اولمایاسان غملره آلوده جاهاندا
فعله ئوزونه باخما بو بیهوده جاهاندا
ئوز فیکرینی چک اول دحی فرسوده جاهاندا
بو چرخ فلک ترسینه دوران ائدیر ایندی
فعله ده اوزون داخیلی اینسان ائدیر ایندی
گور میلتینین دردینی آخدارما دواسین
ال چکمه یتیمین باشینا کسمه صداسین
زینهار قویوپ دهریده بر خیر بناسین
یاد ایله مه شاد ایله مه میلت فقراسین
بو چرخ فلک ترسینه دوران ائدیر ایندی
فعله ده اوزون داخیلی اینسان ائدیر ایندی
